Thursday, November 19, 2009

Kuro kah id Dusun



Kuro kah id Dusun:
1) Yang penting:  "Iri nopo ii tapangkol". Iti boh kaka koubasanan di pogulu nga baino nopo dii nga nopirian tokou moboros doh "Yang penting". Bah! Umbalan tokou gia minsingubas doh moboros, "Iri nopo ii tapangkol...."

2) Makan: "Mongumpos-umpos" toi koh  "Monduom." Iri nopo di pogulu nga moboros ii mololohing kumaa di tanganak,"Kanou mongumpos-umpos doh tian," kah. Bah! kano umbalai tokou momoguno boros tii.

3) Minum: Monigok; "Bah monigok oku poh waig",  "Umbalai gia monigok tii bahar gaman." Bah! Alansan dah mumbal tokou doh mogigiboros id boros tokou sondiri.

Bah, hino kou poh.

Friday, November 13, 2009

Kada kotiyangamai boh!


Ogomu oh  tulun tokou doh baino, lolobi poh dii tanganak om sukod kawawagu doh otiyangaman doh moboros doh boros dau sondiri. Nunu dii kotiyangami toi koh koikum-ikum doh moboros boros dii pinatahak doh Minamangun?  Olumis boh iti boros tokou. Iri noh doh aiso ii doh sabap tokou doh amu moboros boros sondiri. Sabab olundus om osonong bogi iti boros tokou.

Intangai tokou pogi ilo tinaau toi koh bangsa doh suai miagal daoh tulun Cina, tulun Indonesia, tulun India, tulun Murut om tulun malayu, tulun Biritis, om tulun Amerika om agumo poh oh tinaau suai ii moboros om momogompi kapio oh boros diolo sondiri.  Iti  noh dah mangan tokou ombitanai om tonudoh mogi doh amu dii  opupusan om opunso iti boros dotokou.

Oi tompinai koh ngaavi ii komoyon doh tulun Kadazan/Dusun kano noh munsikou om ondos daoh doh boros sondiri. Kada tokou lisiko iti boros dotokou. Poiaaho om potungkuso tokon noh iti boros tokou kumaa doid sukod doh kawawagu mongoi poinpasai toririmo ito boros tokou!

Boros tokou


Toiso-iso doh tinaau toi koh bangsa hiti pomogunan haro doh boros diolo sondiri. Ingkaa nogi oh tulun tokou. Haro nogi  boros tokou sondiri. Iri nodi dah dot minsingilo toi koh balajar tokou noh dah dot boros tokou sondiri. Kada tokou lingai toi koh tongkidai oh boros tokou sondiri. Sabab boros nopo nga kointutunan doh toiso-iso doh tinaau. Sabab noh dilo kano noh balajar doh moboros doh boros tokou sondiri.

Amu noh dah osonong doh mangakun tokou doh tulun doh Kadazan toi Dusun om amu ii dii koilo doh moboros boros sondiri. Kotingayam noh moti dot komoyon doh tulun Kadazan/Dusun kah om amu ii koilo doh moboros dot boros sondiri. Jadi, kano noh balajar doh boros tokou sondiri om moboros dah boros doh pinatahak doh Kinorohingan diti doh tikid tadau.

Osonong ii bogia doh koili doh boros doh suai. Miagal doh boros doh malayu om boros doh Ingilis nga kada dii gia tokou tolikudai toi koh tongkidai oh boros doh tokou sondiri. Orubat noh moti nung atagak noh iti boros tokou. Om iso ralan doh tosonong noh kopio doh mongogompi doh boros dotokou diti nga: Koiso nopo nga   tudukan toi koh iaaho tokou tanganak tokou sondiri doh boros/boos diti. Om koduvo nopo nga parasan om monikiboros doh boros dii kumaa doid tanganak tokou. Kotolo noh nga mambasa buuk id boros tokou sondiri. Om kaapat nopo naga mokinongou doh Radio pangaan Kadazan/Dusun id RTM.

Jadi, oi tompinai ngaavi doh Kadazan/Dusun kano noh guno om gompio tokou noh boros tokou sondiri ii pinokungkus doh molohing-lohing tokou om ii pintahak doh Kinorohingan doid dotokou.